«بە باوەڕ تێدەگەین…» (عیبرانییەکان 11:3) «بە باوەڕ تێدەگەین…» ئەم وشانە یەکێک لە بنەماییترین بنەماکانی ژیانی ڕۆحی لەخۆدەگرن. سەرەتا باوەڕ بە ووشەی خودا دەهێنین، پاشان تێدەگەین. جیهان دەڵێت، «بینین باوەڕهێنانە؛» خودا دەڵێت، «باوەڕهێنان بینینە.» مەسیح عیسا بە مارسا فەرمووی، «ئایا پێت نەگوتم، ئەگەر باوەڕ بهێنیت، دەبینیت…» (یۆحەننا 11:49). دواتر بە تۆما فەرمووی، «…خۆزگە بەوانەی کە نەیانبینیوە، و هێشتا باوەڕیان هێناوە» (یۆحەننا 20:29). و نێردراو یۆحەننا نووسی، «ئەم شتانەم بۆ ئێوە نووسیوە کە باوەڕ دەهێنن… بۆ ئەوەی بزانن…» (1 یۆحەننا 5:13).
سەرەتا باوەڕ بهێنە، پاشان دەزانیت. بیلی گراهام دەگێڕێتەوە چۆن ئەم بنەمایە لە ژیانیدا زیندوو بووەوە:
«لە ساڵی 1949دا گومانێکی زۆرم لەسەر کتێبی پیرۆز هەبوو. وام دەزانی ناکۆکیی ئاشکرا لە نووسینەکاندا دەبینم. هەندێک شتم نەدەتوانی لەگەڵ چەمکی سنوورداری خۆم لە خودا بگونجێنم. کاتێک هەڵدەستام بۆ وتاردان، ئەو دەنگە دەسەڵاتدارەی کە تایبەتمەندیی هەموو وتاربێژە گەورەکانی ڕابردوو بوو، نەبوو. وەک سەدان خوێندکاری تری سەمیناری، شەڕی فیکریی ژیانم دەکرد. ئەنجامەکە بە دڵنیاییەوە کاریگەری لەسەر خزمەتی داهاتووم دەبوو.
«لە مانگی ئابی ئەو ساڵەدا بانگهێشت کرابووم بۆ فۆرێست هۆم، سەنتەری کۆنفرانسی پرێسبیتێری لە بەرزاییەکانی چیاکان لە دەرەوەی لۆس ئەنجلۆس. بیرم دێت بە ڕێڕەوێکدا دەڕۆیشتم، دەچوومە ناو دارستانەکان، و نزیکەی زۆرانبازیم لەگەڵ خودا دەکرد. لەگەڵ گومانەکانمدا شەڕم دەکرد، و ڕۆحم وادیار بوو لە ناوەڕاستی شەڕەکەدا گیرساوەتەوە. لە کۆتاییدا، بە بێهیوا، ئیرادەی خۆمم ڕادەستی خودای زیندوو کرد کە لە نووسینەکاندا ئاشکرا بوو. لەبەردەم کتێبی پیرۆزدا چۆکمدادا و گوتم، 'خودایە، زۆر شت لەم کتێبەدا تێناگەم. بەڵام تۆ فەرمووت، 'ڕاستودروست بە باوەڕ دەژی.' هەموو ئەوەی کە لە تۆوە وەرمگرتووە، بە باوەڕ وەرمگرتووە. لێرە و ئێستا، بە باوەڕ، کتێبی پیرۆز وەک ووشەی تۆ قبوڵ دەکەم. هەمووی وەردەگرم. بەبێ هیچ مەرجێک وەری دەگرم. لەو شوێنانەی کە ناتوانم تێبگەم، بڕیارەکەم دوا دەخەم تاوەکو ڕووناکیی زیاترم پێدەگات. ئەگەر ئەمە تۆ دڵخۆش دەکات، دەسەڵاتم پێبدە کاتێک ووشەی تۆ ڕادەگەیەنم، و بەو دەسەڵاتە پیاوان لە گوناه تاوانبار بکە و گوناهباران بەرەو ڕزگارکەر بگەڕێنەوە!
«لە ماوەی شەش هەفتەدا هەڵمەتی لۆس ئەنجلۆسمان دەستپێکرد، کە ئێستا مێژووە. لەو هەڵمەتەدا نهێنییەکەم دۆزییەوە کە خزمەتەکەم گۆڕی. وازم لە هەوڵدان بۆ سەلماندنی ئەوە هێنا کە کتێبی پیرۆز ڕاستە. لە مێشکی خۆمدا جێگیرم کردبوو کە ڕاستە و ئەم باوەڕە گوازرایەوە بۆ گوێگران.» و.د.
