وەک مرۆڤێک مەسیح بە شکۆ و گەورەیی نەهات بۆ ئەوەی پیاوان سەرسامی بن، بەڵام لە ئیشایا ٥٣:٢ دەخوێنین:
شێوە و گەورەیی نییە، و کاتێک دەیبینین، جوانییەک نییە کە حەزی لێ بکەین. کاتێک سەربازەکان هاتن بۆ گرتنی، نەیانتوانی بی ناسنەوە کە ئەو کوڕی خودایە.
بەڵام تەنانەت وەک مرۆڤیش خۆی بێفیز کرد. ئەو وەک پاشایەکی بەهێز و فەرمانڕەوایەک بە گالیسکە و سامانێکی زۆرەوە نەهات، بەڵکو ئامادە بوو لە ئاخوڕێکدا لەدایک بێت. ئەو کە دەوڵەمەند بوو، بۆ خاتری ئێمە هەژار بوو. لە کاتی خزمەتە گشتییەکەیدا وتی:
ڕێوی کون و باڵندەکانی ئاسمان هێلانەیان هەیە، بەڵام کوڕی مرۆڤ شوێنی نییە سەری لێ دابنێت (لۆقا ٩:٥٨). ئەو ژیانێکی هەژارانەی ژیا.
وەک مرۆڤێک هەوڵی نەدا خۆی بەرز بکاتەوە بەڵکو وتی:
کوڕی مرۆڤ نەهات بۆ ئەوەی خزمەتی بکرێت، بەڵکو بۆ ئەوەی خزمەت بکات، و ژیانی خۆی بکاتە قوربانی بۆ زۆر کەس (مەرقۆس ١٠:٤٥). تەنها ئەو کەسەی مافی فەرمانڕەوایی هەبوو هات بۆ ئەوەی بە بێفیزی خزمەت بکات. لە یۆحەننا ١٣دا دەیبینین کە پێیە پیسەکانی قوتابییەکانی دەشوات.
باوک هەموو شتێکی خستبووە دەستی — کەسێکی وا گەورە بوو — بەڵام پێیە پیسەکانی قوتابییەکانی دەخاتە دەستە پیرۆزەکانییەوە. ئەوە بیرکردنەوەی مەسیح بوو. هەر بۆیەش لە کۆتایی ژیانیدا دەی توانی بە قوتابییەکانی بڵێت:
من لە ناو ئێوەدام وەک ئەو کەسەی خزمەت دەکات (لۆقا ٢٢:٢٧). نەک تەنها ئەوە. ئەو کە دروستکەری ئاسمان و زەوییە، ئەو کە فەرمانی بە ملیارەها و ملیارەها فریشتە دا کە دەبوو گوێڕایەڵی بکەن، خۆی گوێڕایەڵ بوو. وەک مرۆڤێک، گوێی هەموو بەیانییەک بەئاگا دەهات و دەکرایەوە بۆ ئەوەی لە ویستی باوکی فێر بکرێت. ئەو نەهات بۆ ئەوەی ویستی خۆی بکات بەڵکو ویستی ئەو کەسەی کە ناردبووی. ئەو ویستی خۆی وەلا نا بۆ ئەوەی ویستی کەسێکی تر بکات. ئەو گوێڕایەڵیی فێر بوو بەو شتانەی کە ئازاری چێژت. چەند زیاتر لە ڕێگای گوێڕایەڵیدا بەردەوام بوو بۆ خودا و باوکی، زیاتر ڕووبەڕووی دژایەتی پیاوان دەبووەوە. هەر بۆیەش دەبوو بڵێت:
سەرکۆنەکانی ئەوانەی سەرکۆنەی تۆیان دەکرد، بەسەر مندا کەوتن (ڕۆما ١٥:٣). گوێڕایەڵییەکەی گەیشتە ئەو خاڵەی کە، بە لەبەرچاوگرتنی خاچەکە، بە دەم و چاوەوە کەوتە سەر زەوی بە گریانێکی بەهێز و فرمێسکەوە هاواری دەکرد:
نەک ویستی من، بەڵکو ویستی تۆ بێت (لۆقا ٢٢:٤٢). ئەو ئامادە بوو ژیانی خۆی دابنێت. کەس لێی وەرنەگرت. خۆی ڕۆحی خۆی ڕادەستی دەستەکانی باوکی کرد. ئەم فەرمانەی لە باوکی وەرگرتبوو و گوێڕایەڵی کرد تا کۆتایی. ئەو گیانی خۆی ڕشتە ناو مردن.
دەتوانین بیر بکەینەوە کە ئەمە نزمترین خاڵی مومکین بوو. بەڵام وانەبوو. ئەو مردنێکی ئاسایی نەمرد. ئەو گوێڕایەڵ بوو تا مردنی خاچەکە. کتێبی پیرۆز دەڵێت:
نەفرەت لێکراوە هەر کەسێک کە بە دارێکەوە هەڵواسراوە (غەلاتییەکان ٣:١٣).
ئەو خراپترین و شەرمهێنەرترین مردنی مرد کە دەتوانین بیری لێ بکەینەوە. تاوانبارە ترسناکەکان بە خاچ کێشان لە سێدارە دەدران. و ئەوانەی بەلای خاچەکەدا تێدەپەڕین دەبێت وایان بیر کردبێتەوە کە ئەو یەکێکە لەوان. ئەو «لەگەڵ سەرپێچیکاراندا هەژمار کرا» (ئیشایا ٥٣:١٢). ئەو بەڕاستی نزمترین شوێنی گرت کە دەتوانین بیری لێ بکەینەوە و لە کۆتاییدا «هەروەها دابەزی بۆ بەشە خوارەوەکانی زەوی» (ئەفەسۆس ٤:٩).
ئەوە بیرکردنەوەی مەسیح بوو: واز لە شتەکان بهێنێت و نزمتر و نزمتر بێتەوە. ئەو شکۆمەندی دەرەوەی خۆی وەلا نا، خۆی کردە هیچ، شێوەی کۆیلەیەکی وەرگرت و لە فریشتەکان نزمتر بوو. وەک مرۆڤێک جوانی نەبوو و هەوڵی نەدا فەرمانڕەوایی بکات بەڵکو خۆی بێفیز بکات، هەژار بێت و بە خۆشەویستی خزمەتی ئەوانی تر بکات. ئەو ویستی خۆی وەلا نا، هەمیشە ویستی باوکی دەکرد؛ ئەو ئامادە بوو ژیان و ناوبانگی خۆی دابنێت و مردنێکی شەرمهێنەری خاچەکە بمرێت و لە نێو سەرپێچیکاراندا هەژمار بکرێت.
ئەمە ئەو بیرکردنەوەیەیە کە دەبێت لاسایی بکەینەوە. لە جیاتی ئەوەی سوور بین لەسەر مافەکانمان، دەبێت شوێن نموونەی ئەو بکەوین. لە فیلیپی دوو خوشک هەبوون کە ناکۆکییان هەبوو. چارەسەری کێشەکەیان نیشاندانی بیرکردنەوەی مەسیح بوو. کاتێک بیرکردنەوەی مەسیح لە پەیوەندییەکانماندا لە نێوان باوەڕداران نیشان دەدەین، زۆر کێشە نامێنن و ئاشتی و ئارامی ئەنجامەکەی دەبێت.
