ڕووناکی ڕۆژانە, تشرینی دووەم ٥: تۆش بۆ خۆت باشترین بۆن ببە

تۆش بۆ خۆت باشترین بۆن ببە ... بەمانە زەیتی پیرۆز بۆ دەستنیشانکردن دروستبکە.

دەرچوون ٣٠:٢٣, ٢٥

نابێت بەسەر لەشی کەسدا بکرێت و نابێت بە پێوانەکانی وەک ئەو دروستبکرێت. ئەم زەیتە پیرۆزە، دەبێت لەلاتان پیرۆز بێت.

دەرچوون ٣٠:٣٢

هەروەک یەک جەستە و یەک ڕۆح هەیە.

ئەفەسۆس ٤:٤

جۆرەها بەهرە هەیە، بەڵام هەمان ڕۆحە.

یەکەم کۆرنسۆس ١٢:٤

خودای خۆت، لە سەرووی هاوەڵەکانتەوە داینای، بە ڕۆنی شادی دەستنیشانی کردیت.

زەبوورەکان ٤٥:٧

چۆن خودا بە ڕۆحی پیرۆز و هێز عیسای ناسیرەیی دەستنیشان کرد.

کردار ١٠:٣٨

لەبەر ئەوەی خودا بێ سنوور ڕۆحی پیرۆز دەبەخشێت.

یۆحەنا ٣:٣٤

لە گەنجینەی پڕیی ئەوەوە هەموومان نیعمەت لەدوای نیعمەتمان وەرگرتووە.

یۆحەنا ١:١٦

بەڵکو ڕۆحی پیرۆز هەموو شتێکتان فێردەکات. ئەم دەستنیشانکردنە ڕاستە و درۆ نییە، بۆیە پەیوەست بن بە مەسیحەوە وەک ڕۆحی پیرۆز فێری کردوون.

یەکەم یۆحەنا ٢:٢٧

ئەو دەستنیشانی کردووین و خودا مۆری خۆی لێداوین و وەک پێشەکی ڕۆحی خۆی خستە دڵمانەوە بۆ دەستەبەری ئەوەی دێت.

دووەم کۆرنسۆس ١:٢١–٢٢

بەڵام بەروبوومی ڕۆحی پیرۆز ئەمەیە: خۆشەویستی، خۆشی، ئاشتی، ئارامگرتن، نیانی، چاکە، دڵسۆزی، دڵنەرمی و بەسەرخۆدا زاڵبوون. شەریعەت نییە لە دژی ئەمانە بێت.

گەلاتیا ٥:٢٢–٢٣

چونکە وێنەی ئەم جیهانە ڕووەو نەمانە.

یەکەم کۆرنسۆس ٧:٣١

هەموو تەمەنی مەتوشالح نۆ سەد و شەست و نۆ ساڵ بوو، ئیتر مرد.

پەیدابوون ٥:٢٧

با برای پایەنزم شانازی بە بەرزییەکەیەوە بکات، دەوڵەمەندیش بە نزمییەکەی، چونکە وەک گوڵی گژوگیا لەناودەچێت. لەبەر ئەوەی ڕۆژ بە گەرمییە سووتێنەرەکەی هەڵدێت، گژوگیا وشک دەبێت و گوڵەکەی هەڵدەوەرێت و دیمەنی جوانی نامێنێت. بە هەمان شێوە، دەوڵەمەندیش کاتێک سەرقاڵە بە کارەکانییەوە لەناودەچێت.

یاقوب ١:٩–١١

ژیانتان چییە؟ چونکە هەڵمێکە، ماوەیەک دەردەکەوێت، دواتر نامێنێت.

یاقوب ٤:١٤

جیهان و ئارەزووەکانی بەسەردەچن، بەڵام ئەوەی خواستی خودا جێبەجێ دەکات بۆ هەتاهەتایە دەژیێت.

یەکەم یۆحەنا ٢:١٧

ئەی یەزدان، کۆتایی ژیانی خۆم پیشان بدە، هەروەها ڕۆژەکانی ژیانم چەندە، بۆ ئەوەی بزانم من چ فەوتاوێکم.

زەبوورەکان ٣٩:٤

کاتێک خەڵکی دەڵێن: «ئاشتی و ئاسایشە،» دەستبەجێ مردن دێتە سەریان، وەک ژانی ژنی سکپڕ لە ناوەختدا دێت و ناشتوانن دەربازیان بێت. بەڵام ئێوە خوشکان، برایان، لە تاریکیدا نین تاکو ئەو ڕۆژە وەک دز لەناکاو بێتە سەرتان.

یەکەم سالۆنیکی ٥:٣–٤