ڕووناکی ڕۆژانە, کانوونی دووەم ٢٢: ئەی یەزدان، تۆ خودای منیت!

هەتاهەتایە ئەم خودایە خودامانە، هەتا مردنیش ئەو ڕابەرمانە.

زەبوورەکان ٤٨:١٤

ئەی یەزدان، تۆ خودای منیت! بە گەورەت دەزانم، ستایشی ناوت دەکەم، چونکە تۆ کاری سەرسوڕهێنەرت کردووە، پلانەکانت لە دێرزەمانەوەن، بە دڵسۆزی چەسپاون.

ئیشایا ٢٥:١

ئەی یەزدان، تۆ بەشە میرات و چارەنووسی منی.

زەبوورەکان ١٦:٥

بەرەو ڕێگای ڕاستودروستی ڕێنماییم دەکات لە پێناوی ناوی خۆی. ئەگەر تەنانەت بەناو دۆڵی سێبەری مەرگیشدا بڕۆم، لە هیچ خراپەیەک ناترسم، لەبەر ئەوەی تۆ لەگەڵمدای، گۆچان و داردەستەکەت دڵنەواییم دەکەن.

زەبوورەکان ٢٣:٣–٤

دەستی ڕاستی منت گرت. بە ئامۆژگاریت ڕێنماییم دەکەیت، پاشان بۆ شکۆمەندیم دەبەیت. بێجگە لە تۆ لە ئاسمان کێم هەیە؟ ئەگەر لەگەڵ تۆ بم، لەسەر زەویش هیچ نییە ئارەزووی بکەم. جەسته و دڵم کۆتاییان پێدێت، بەڵام هەتاهەتایە هێزی دڵ و بەشی من خودایە.

زەبوورەکان ٧٣:٢٣–٢٦

دڵمان بەو خۆشە، چونکە ئێمە پشت بە ناوی پیرۆزی ئەو دەبەستین.

زەبوورەکان ٣٣:٢١

یەزدان ئەستۆپاکیم دەسەلمێنێت؛ ئەی یەزدان، خۆشەویستییە نەگۆڕەکەت هەتاهەتاییە، واز لە کارەکانی دەستت مەهێنە.

زەبوورەکان ١٣٨:٨

کە خەم لە ناخم زۆر بوو، دڵنەوایی تۆ گیانی منی شاد کرد.

زەبوورەکان ٩٤:١٩

کە دڵم لاواز دەبێت، پێشڕەویم بکە بۆ سەر تاشەبەردێکی لە خۆم بڵندتر.

زەبوورەکان ٦١:٢

وەڕس بووم، ئەی پەروەردگار، بە هانام وەرە!

ئیشایا ٣٨:١٤

خەمەکانت بە یەزدان بسپێرە، ئەو پشتگیریت دەکات.

زەبوورەکان ٥٥:٢٢

منیش مێردمنداڵێکی بچووکم و شارەزاییم لە ڕابەرایەتیکردن نییە.

یەکەم پاشایان ٣:٧

ئەگەر یەکێکتان لە دانایی کەموکوڕی هەیە، ... پێشی دەبەخشرێت.

یاقوب ١:٥

ئایا کێ شیاوە بۆ ئەم شتانە؟

دووەم کۆرنسۆس ٢:١٦

چونکە دەزانم هیچ چاکەیەک لە مندا نیشتەجێ نییە، واتا لە سروشتی دنیاییمدا.

ڕۆما ٧:١٨

نیعمەتی منت بەسە، چونکە هێزی من لە لاوازیدا تەواو دەبێت. بۆیە بەوپەڕی شادییەوە شانازی بە لاوازیمەوە دەکەم.

دووەم کۆرنسۆس ١٢:٩

کوڕم، ورەت بەرز بێت، گوناهەکانت بەخشران ... کچم دڵنیابە، باوەڕەکەت تۆی چاککردەوە. ژنەکە دەستبەجێ چاک بووەوە.

مەتا ٩:٢, ٢٢

گیانم تێر دەبێت وەک ئەوەی بە دوگ و چەوری ... لەناو نوێنەکەم یادی تۆ دەکەم، بە درێژایی شەو بیر لە تۆ دەکەمەوە.

زەبوورەکان ٦٣:٥–٦