ڕووناکی ڕۆژانە, ئازار ١٤: ئەو قسانەی پێم گوتن ڕۆح و ژیانن

هیچیان لێ نەدزن، بەڵکو ئەوپەڕی دەستپاکی پیشان بدەن، تاکو لە هەموو شتێکدا فێرکردنی خودای ڕزگارکەرمان بڕازێننەوە.

تیتۆس ٢:١٠

تەنها بە شێوەیەک بژین کە شایستەی پەیامی ئینجیلی مەسیح بێت.

فیلیپی ١:٢٧

لە هەموو جۆرە خراپەیەک دوور بکەونەوە.

یەکەم سالۆنیکی ٥:٢٢

ئەگەر بە ناوی مەسیح جنێوتان پێدرا ... با کەستان وەک بکوژێک یان دزێک یان بەدکارێک یاخود یەکێک دەست لە کاروباری خەڵک وەربدات ئازار نەچێژێ.

یەکەم پەترۆس ٤:١٤–١٥

تاکو بێ کەموکوڕی و پاک بن، منداڵانی خودا لەناو نەوەیەکی چەوت و خواردا بێ لەکەن، لەنێو ئەواندا وەک ئەستێرە لە گەردووندا دەدرەوشێنەوە.

فیلیپی ٢:١٥

بە هەمان شێوە، با ئێوەش ڕووناکیتان بۆ خەڵک بدرەوشێتەوە، تاکو کردارە باشەکانتان ببینن و ستایشی باوکتان بکەن کە لە ئاسمانە.

مەتا ٥:١٦

با خۆشەویستی نەگۆڕ و دڵسۆزی لێت جیا نەبنەوە، بە ملتەوە گرێیان بدە، لەسەر پەڕەی دڵت بیاننووسە. ئینجا پەسەندی و نازناوی چاک بەدەستدەهێنیت لەلای خودا و خەڵک.

پەندەکانی سلێمان ٣:٣–٤

لە کۆتاییدا خوشکان و برایان، بیر لە هەموو ئەو شتانە بکەنەوە کە ڕاست و ڕێزدارن، دادپەروەر و پاکن، خۆشەویست و ناوبانگ باشن، ڕەوشت بەرز و شایانی ستایشن.

فیلیپی ٤:٨

بەڵام جەستە بە کەڵک نایەت. ئەو قسانەی پێم گوتن ڕۆح و ژیانن.

یۆحەنا ٦:٦٣

خواستی لەسەر بوو کە بە وشەی ڕاستی لەدایک ببین.

یاقوب ١:١٨

چونکە ئەو پیتە نووسراوە دەکوژێت، بەڵام ڕۆحەکە ژیان دەدات.

دووەم کۆرنسۆس ٣:٦

هەروەک مەسیحیش کڵێسای خۆشویست و لە پێناوی خۆی بەختکرد، تاکو پیرۆزی بکات و بە شوشتنی بە ئاو لە ڕێگەی وشەوە پاکی بکاتەوە، بۆ ئەوەی کڵێسایەکی شکۆدار بۆ خۆی ئامادە بکات، لەکە و لۆچ و هیچ شتێکی ئاوای نەبێت.

ئەفەسۆس ٥:٢٥–٢٧

گەنج بە چی هەڵسوکەوتی خۆی بێگەرد دەکات؟ بە پاراستنی وشەکانت. ... بەڵێنەکەت منی ژیاندەوە. وشەکانی تۆم لەناو دڵم پاراستووە، تاکو لە دژی تۆ گوناه نەکەم. ... وشەکانی تۆم لە یاد ناچێت. ... چونکە پشتم بە بەڵێنی تۆ بەستووە. فێرکردنی دەمی تۆ لە هەزار زێڕ و زیو باشترە بۆ من. هەرگیز ڕێنماییەکانت لەبیرناکەم، چونکە بەوان منت ژیاندەوە. بەڵێنەکانت چەند شیرینن بۆ زمانم، لە هەنگوین شیرینترن بۆ دەمم. لە ڕێنماییەکانی تۆ تێگەیشتنم بەدەستهێنا، بۆیە ڕقم لە هەموو ڕێگایەکی خوارە.

زەبوورەکان ١١٩:٩, ٥٠, ١١, ١٦, ٤٢, ٧٢, ٩٣, ١٠٣–١٠٤