ڕووناکی ڕۆژانە, ئایار ٢: بێگومان یەزدان لەم شوێنەیە

بێگومان یەزدان لەم شوێنەیە، منیش نەمزانی!

پەیدابوون ٢٨:١٦

چونکە لە هەرکوێیەک دوو یان سێ کەس بە ناوی منەوە کۆببنەوە، من لەوێ لەنێوانیاندا دەبم.

مەتا ١٨:٢٠

دڵنیابن من هەموو ڕۆژێک لەگەڵتانم، هەتا کۆتایی زەمان.

مەتا ٢٨:٢٠

یەزدان فەرمووی: «من خۆم لەگەڵت دەبم و دەتحەسێنمەوە.»

دەرچوون ٣٣:١٤

بۆ کوێ بچم لە ڕۆحی تۆ؟ بۆ کوێ هەڵبێم لە ڕوخسارت؟ ئەگەر سەربکەوم بۆ ئاسمان، ئەوەتا تۆ لەوێی، ئەگەر لەناو جیهانی مردووان ڕاکشێم، ئەوەتا تۆ لەوێی.

زەبوورەکان ١٣٩:٧–٨

«ئایا من تەنها لە نزیکەوە خودام و لە دوورەوە خودا نیم؟»ئەوە فەرمایشتی یەزدانە. «یان کەس هەیە لە پەناگا خۆی بشارێتەوە و من نەیبینم؟ ئایا من ئاسمان و زەوی پڕناکەمەوە؟»ئەوە فەرمایشتی یەزدانە.

یەرمیا ٢٣:٢٣–٢٤

ئەوەتا ئاسمان و ئاسمانی ئاسمانەکان جێی تۆیان تێدا نابێتەوە، ئیتر چۆن ئەم پەرستگایە کە من بنیادم ناوە!

یەکەم پاشایان ٨:٢٧

خودای بەرز و بڵند کە بە نەمری نیشتەجێیە، ناوی پیرۆزە، ئەمە دەفەرموێت: «لە جێی بەرز و پیرۆز نیشتەجێم، هەروەها لەگەڵ ئەوانەدام کە دڵشکێنراون و بێفیزن، بۆ ئەوەی بێفیز و دڵشکێنراوەکان بژیێنمەوە.

ئیشایا ٥٧:١٥

چونکە ئێمە پەرستگای خودای زیندووین.

دووەم کۆرنسۆس ٦:١٦

خۆتان لە بت بپارێزن.

یەکەم یۆحەنا ٥:٢١

ڕۆڵە، دڵی خۆتم بدەرێ.

پەندەکانی سلێمان ٢٣:٢٦

بایەخ بەو شتانەی سەرەوە بدەن، نەک ئەوانەی لەسەر زەوین.

کۆلۆسی ٣:٢

ئەی کوڕی مرۆڤ، ئەم پیاوانە لە دڵەوە بتپەرستی دەکەن و کۆسپی تاوانکارییان لەبەردەمی خۆیان داناوە، جا ئایا لەلایەن ئەوانەوە هیچ پرسێکم پێ بکرێت؟

حزقیێل ١٤:٣

کەواتە ئارەزووە دنیاییەکانتان بمرێنن: داوێنپیسی، گڵاوی، هەوەسبازی، ئارەزووی خراپ، چاوبرسیێتی کە جۆرێکە لە بتپەرستی.

کۆلۆسی ٣:٥

بەڵام ئەوانەی حەز دەکەن دەوڵەمەند بن، دەکەونە تاقیکردنەوە و داوەوە، ... لەبەر ئەوەی خۆشویستنی پارە یەکێکە لە سەرچاوەکانی هەموو جۆرە خراپەکارییەک، هەندێک کەس بەدوایدا گەڕان ون بوون لە باوەڕەکەیان و خۆیان تووشی ئازارێکی زۆر کرد. بەڵام تۆ، ئەی پیاوی خودا لەم شتانە ڕابکە.

یەکەم تیمۆساوس ٦:٩–١١

ئەگەر سامانتان زیادی کرد، دڵی خۆتانی پێوە مەبەستن.

زەبوورەکان ٦٢:١٠

بەرهەمی من لە زێڕ باشترە، لە زێڕی بێگەردیش، دەغڵیشم لە زیوی پوختەکراو باشترە.

پەندەکانی سلێمان ٨:١٩

چونکە سامانت لەکوێ بێت، دڵیشت لەوێ دەبێت.

مەتا ٦:٢١

بەڵام یەزدان تەماشای دڵ دەکات.

یەکەم ساموئێل ١٦:٧