ڕووناکی ڕۆژانە, کانونی یەکەم ٣: هەر لە جەستەی خۆم خودا دەبینم

بەڵام ئەگەر من لە جێی تۆ بوومایە داوام لە خودا دەکرد و کێشەی خۆمم دەدایە دەست ئەو.

ئەیوب ٥:٨

هیچ شتێک هەیە بۆ یەزدان ئەستەم بێت؟

پەیدابوون ١٨:١٤

ڕێگای خۆت بە یەزدان بسپێرە و متمانەی پێ بکە و ئەو ئاوا دەکات.

زەبوورەکان ٣٧:٥

نیگەران مەبن، بەڵکو با لە هەموو شتێکدا داواکاریتان بە نوێژ و پاڕانەوە و سوپاسگوزارییەوە لەلای خودا زانراو بێت.

فیلیپی ٤:٦

هەموو خەمێکتان بە خودا بسپێرن، چونکە ئەو بایەختان پێدەدات.

یەکەم پەترۆس ٥:٧

حەزقیا نامەکەی لە دەستی نێردراوەکان وەرگرت و خوێندییەوە. ئینجا سەرکەوت بۆ پەرستگای یەزدان، لەبەردەم یەزدان ڕایخست. حەزقیا نوێژی بۆ یەزدان کرد و گوتی.

ئیشایا ٣٧:١٤–١٥

جا بەر لەوەی نزا بکەن من وەڵام دەدەمەوە و هێشتا ئەوان قسە دەکەن من گوێم لێیان دەبێت.

ئیشایا ٦٥:٢٤

نوێژی کەسی ڕاستودروست زۆر بەهێز و کاریگەرە.

یاقوب ٥:١٦

یەزدانم خۆشدەوێت، چونکە گوێ لە دەنگ و لە پاڕانەوەم دەگرێت، چونکە گوێی خۆی بۆم شل کرد، هەتا ماوم هەر لێی دەپاڕێمەوە.

زەبوورەکان ١١٦:١–٢

با بە دڵێکی ڕاست و بە متمانەی تەواوی باوەڕ بچینە بەردەم خودا.

عیبرانییەکان ١٠:٢٢

حەوزێک لە بڕۆنز دروستبکە و ژێرەکەشی لە بڕۆنز بێت بۆ شوشتن، لەنێوان چادری چاوپێکەوتن و قوربانگاکەی دابنێ و ئاوی تێبکە. هارون و کوڕەکانی دەست و پێیانی لێ بشۆن، لە کاتی چوونە ژوورەوەیان بۆ چادری چاوپێکەوتن بە ئاو بیشۆن نەوەک بمرن. ... دەست و پێیان بشۆن نەوەک بمرن.

دەرچوون ٣٠:١٨–٢١

یاخود نازانن کە لەشتان پەرستگای ڕۆحی پیرۆزە کە لە ئێوەدایە و لەلایەن خوداوەیە هەتانە؟

یەکەم کۆرنسۆس ٦:١٩

ئەگەر یەکێک پەرستگای خودا وێران بکات، خودا وێرانی دەکات، چونکە پەرستگای خودا پیرۆزە، ئێوە ئەو پەرستگایەن.

یەکەم کۆرنسۆس ٣:١٧

هەر لە جەستەی خۆم خودا دەبینم. ئەوەی من بۆ خۆم دەیبینم و چاوەکانم تەماشا دەکەن، نەک یەکێکی دیکە.

ئەیوب ١٩:٢٦–٢٧

هیچ شتێکی گڵاو و هیچ کەسێکی قێزەون و درۆزن ناچنە ناوی.

ئاشکراکردن ٢١:٢٧

چاوەکانت لەوە پاکترن تەماشای خراپە بکەن، ناتوانیت بەرگەی خراپەکاری بگریت.

حەبەقوق ١:١٣

بۆیە ئەی خوشک و برایان، لەبەر میهرەبانی خودا لێتان دەپاڕێمەوە لەشتان وەک قوربانییەکی زیندوو پێشکەش بکەن، پیرۆز و پەسەندکراو لەلای خودا، کە پەرستنی هۆشمەندانەتانە.

ڕۆما ١٢:١