ڕووناکی ڕۆژانە, تەمووز ١٢: من خۆم لەگەڵت دەبم و دەتحەسێنمەوە

یەزدان فەرمووی: «من خۆم لەگەڵت دەبم و دەتحەسێنمەوە.»

دەرچوون ٣٣:١٤

بەهێزبن و ئازابن، لێیان مەترسن و مەتۆقن، چونکە یەزدانی پەروەردگارتان لەگەڵتان دەڕوات، هەرگیز پشتگوێتان ناخات و وازتان لێ ناهێنێ.» یەزدانیش خۆی لەپێشتەوە دەڕوات، ئەو لەگەڵت دەبێت، هەرگیز پشتگوێت ناخات و وازت لێ ناهێنێ، مەترسە و ورە بەرمەدە.

دواوتار ٣١:٦, ٨

ئایا من فەرمانم بە تۆ نەکرد؟ جا بەهێزبە و ئازابە، مەتۆقە و ورە بەرمەدە، چونکە یەزدانی پەروەردگارت لەگەڵتە بۆ هەرکوێ بچیت.

یەشوع ١:٩

لە هەموو ڕێگاکانت بیناسە، ئەویش ڕێچکەکانت ڕاست دەکات.

پەندەکانی سلێمان ٣:٦

﴿هەرگیز پشتگوێت ناخەم، هەرگیز وازت لێ ناهێنم.﴾ کەواتە بە متمانەوە دەڵێین: ﴿یەزدان یارمەتیدەری منە، ناترسم. مرۆڤ دەتوانێت چیم لێ بکات؟﴾.

عیبرانییەکان ١٣:٥–٦

بەڵکو لێهاتووییمان لە خوداوەیە.

دووەم کۆرنسۆس ٣:٥

مەمانخەرە تاقیکردنەوە.

مەتا ٦:١٣

ئەی یەزدان، زانیم کە مرۆڤ خاوەنی ڕێگای خۆی نییە، کەس ناتوانێت ڕێڕەوەکانی خۆی ئاراستە بکات.

یەرمیا ١٠:٢٣

ڕۆژگارم لەناو دەستی تۆدایە.

زەبوورەکان ٣١:١٥

هەروەها با ئاگاداری یەکتری بین بۆ هاندان لەسەر خۆشەویستی و کاری چاک.

عیبرانییەکان ١٠:٢٤

ئای، قسەی ڕاست چەند بریندارکەرە!

ئەیوب ٦:٢٥

تێیاندا بە یادتان دەهێنمەوە تاکو بیری پاکتان بوروژێنم.

دووەم پەترۆس ٣:١

ئینجا ئەوانەی لە یەزدان دەترسان قسەیان لەگەڵ یەکتری کرد، یەزدانیش گوێی شل کرد و گوێی لێبوو. لەبەردەمیدا لە پێچراوەیەک تۆمار کرا، بۆ ئەوەی ببێتە یادەوەرییەک بۆ ئەوانەی لە یەزدان دەترسن و ڕێز لە ناوەکەی دەگرن.

مەلاخی ٣:١٦

ئەگەر دووان لە ئێوە لەسەر زەوی لەسەر هەر شتێک ڕێک بکەون، هەرچی داوا بکەن، باوکم کە لە ئاسمانە بۆتان جێبەجێ دەکات.

مەتا ١٨:١٩

یەزدانی پەروەردگار فەرمووی: باش نییە بۆ پیاو بە تەنها بێت.

پەیدابوون ٢:١٨

دوو کەس لە یەک کەس باشترە، چونکە لە ماندووبوونەکەیان قازانجێکی باشتریان دەبێت. ئەگەر یەکێکیان بکەوێت، هاوڕێکەی هەڵیدەستێنێتەوە. بەڵام قوڕبەسەر ئەوەی کە تەنهایە، دەکەوێت و کەس نییە هەڵیبستێنێتەوە.

ژیرمەندی ٤:٩–١٠

بەڵکو باشترە ئەم بڕیارە بدەن: کۆسپ و تەگەرە لەبەردەم خوشک یان برا دانەنرێت.

ڕۆما ١٤:١٣

باری یەکتری هەڵبگرن و بەم شێوەیە شەریعەتی مەسیح بهێننە دی. ... سەیری خۆشت بکە، نەوەک تۆش تاقی بکرێیتەوە.

گەلاتیا ٦:٢, ١