ڕووناکی ڕۆژانە, ئەیلوول ٢٩: ئێوەش لەسەرتانە پێی یەکتری بشۆن

بەمە خۆشەویستیمان زانی: عیسای مەسیح ژیانی خۆی بۆ ئێمە دانا.

یەکەم یۆحەنا ٣:١٦

تاکو ئەم خۆشەویستییە بناسن کە لە سەرووی زانیارییەوەیە.

ئەفەسۆس ٣:١٩

کەس خۆشەویستیی لەمە گەورەتری نییە کە یەکێک ژیانی خۆی بۆ دۆستەکانی دابنێت.

یۆحەنا ١٥:١٣

نیعمەتی عیسای مەسیحی خاوەن شکۆمان دەزانن، هەرچەندە دەوڵەمەند بوو، لە پێناوی ئێوەدا بووە هەژار، بۆ ئەوەی ئێوە بە هەژاریی ئەو دەوڵەمەند بن.

دووەم کۆرنسۆس ٨:٩

خۆشەویستان، ئەگەر خودا بەم شێوەیە خۆشیویستین، پێویستە لەسەرمان یەکتریمان خۆشبوێ.

یەکەم یۆحەنا ٤:١١

لەگەڵ یەکتری نەرمونیان و بە بەزەیی بن، لە یەکتری خۆشبن، هەروەک چۆن خودا بە یەکبوونتان لەگەڵ مەسیح لێتان خۆشبوو.

ئەفەسۆس ٤:٣٢

بەرگەی یەکتری بگرن، ئەگەر یەکێک سکاڵای لەسەر یەکێک هەبوو، گەردنی یەکتری ئازاد بکەن. وەک مەسیحی باڵادەست لێتان خۆشبوو، ئێوەش لێیان خۆشبن.

کۆلۆسی ٣:١٣

چونکە تەنانەت کوڕی مرۆڤیش نەهاتووە تاکو خزمەت بکرێت، بەڵکو خزمەت بکات و ژیانی خۆی بەخت بکات بۆ کڕینەوەی خەڵکێکی زۆر.

مەرقۆس ١٠:٤٥

لەبەر ئەوەی مەسیحیش لە پێناوتاندا ئازاری چێژت و نموونەی بۆ بەجێهێشتن، تاکو بە هەنگاوەکانیدا بڕۆن.

یەکەم پەترۆس ٢:٢١

ئێوەش لەسەرتانە پێی یەکتری بشۆن. من نموونەیەکم پێدان تاکو ئەوەی بۆم کردن ئێوەش بیکەن.

یۆحەنا ١٣:١٤–١٥

ئێمەش دەبێت ژیانی خۆمان بۆ خوشک و براکانمان دابنێین.

یەکەم یۆحەنا ٣:١٦

چونکە هەرچی باوک دەیکات، کوڕەکەش دەیکات.

یۆحەنا ٥:١٩

چونکە یەزدان دانایی دەبەخشێت، زانیاری و تێگەیشتنیش لە دەمی ئەوە.

پەندەکانی سلێمان ٢:٦

چونکە من دەم و داناییەکتان دەدەمێ کە هەموو بەرهەڵستکارانتان نەتوانن بەرگری بکەن و بەرپەرچی بدەنەوە.

لۆقا ٢١:١٥

چاوەڕێی یەزدان بە، خۆت ئازا بکە و دڵت بەهێز بکە.

زەبوورەکان ٢٧:١٤

نیعمەتی منت بەسە، چونکە هێزی من لە لاوازیدا تەواو دەبێت. بۆیە بەوپەڕی شادییەوە شانازی بە لاوازیمەوە دەکەم.

دووەم کۆرنسۆس ١٢:٩

بۆ بانگکراوەکان، ئەوانەی خودای باوک خۆشی دەوێن و بەهۆی عیسای مەسیحەوە پارێزراون.

یەهوزا ١:١

عیسا کە خەڵک پیرۆز دەکات و ئەو خەڵکەی پیرۆز کراون هەردووکیان سەر بە یەک خێزانن، لەبەر ئەم هۆیەش عیسا شەرم ناکات بە خوشک یان برا ناویان ببات.

عیبرانییەکان ٢:١١

ئایا من ئاسمان و زەوی پڕناکەمەوە؟ئەوە فەرمایشتی یەزدانە.

یەرمیا ٢٣:٢٤

واتا پڕیی ئەو بە هەموو شێوەیەک هەموو گەردوون پڕ دەکات.

ئەفەسۆس ١:٢٣

منم، منم یەزدان، لە من بەولاوە ڕزگارکەر نییە.

ئیشایا ٤٣:١١

چونکە خۆمان بیستمان و دەزانین کە ئەم پیاوە بەڕاستی ڕزگارکەری جیهانە!

یۆحەنا ٤:٤٢

با نیعمەت و ئاشتی لە خودای باوک و عیسای مەسیحی ڕزگارکەرمانەوە لەگەڵت بێت.

تیتۆس ١:٤