ڕووناکی ڕۆژانە, تشرینی دووەم ٢٧: ئەمە دیمەنی شێوەی شکۆمەندی یەزدان بوو

منیش ئەو شکۆیەم داونەتێ کە تۆ بە منت داوە.

یۆحەنا ١٧:٢٢

پەروەردگارم بینی لەسەر تەختێکی بەرز و بڵند دانیشتبوو، دامێنیشی پەرستگاکەی پڕکردبوو. سەرافیمەکان لەبەردەستی بوون ... ئەمیان بانگی ئەوەی دیکەی کرد و گوتی: «یەزدانی سوپاسالار پیرۆزە، پیرۆزە، پیرۆزە! شکۆمەندییەکەی هەموو زەویی پڕکردووە.»

ئیشایا ٦:١–٣

ئیشایا ئەمانەی گوت، چونکە شکۆی ئەوی بینی و باسی کرد.

یۆحەنا ١٢:٤١

لە سەرووی هەموویەوە شێوەیەک وەک دیمەنی مرۆڤ لەسەر تەختەکە بوو. وەک دیمەنی پەلکەزێڕینە لە هەوردا لە ڕۆژی باران، شەوقەکەش ئاوا بوو بۆ دەوروبەری. ئەمە دیمەنی شێوەی شکۆمەندی یەزدان بوو.

حزقیێل ١:٢٦, ٢٨

شکۆمەندی خۆتم پیشان بدە.» هەروەها فەرمووی: «ناتوانیت ڕووم ببینیت، چونکە هیچ مرۆڤێک نییە بمبینێت و بژیێت.

دەرچوون ٣٣:١٨, ٢٠

هەرگیز کەس خودای نەبینیوە جگە لە کوڕە تاقانەکەی خودا، ئەوەی لە باوەشی باوکدایە، ئەو خودای دەرخست.

یۆحەنا ١:١٨

چونکە خودا، ئەوەی فەرمووی: ﴿با لە تاریکیدا ڕووناکی بدرەوشێتەوە،﴾ ئەو لە دڵماندا درەوشایەوە، بۆ ڕووناککردنەوەی ناسینی شکۆی خودا لە ڕووی عیسای مەسیحدا.

دووەم کۆرنسۆس ٤:٦

ڕۆڵە، ئەگەر گوناهباران فریویان دایت، ڕازی مەبە.

پەندەکانی سلێمان ١:١٠

لە بەرەکەی کردەوە و خواردی، دایە مێردەکەشی کە لەگەڵی بوو، ئەویش خواردی.

پەیدابوون ٣:٦

کاتێک عاخانی کوڕی زەرەح ناپاکی کرد لە شتە تەرخانکراوەکاندا، ئایا تووڕەیی یەزدان بەسەر هەموو کۆمەڵی ئیسرائیلدا نەباری؟ بەهۆی گوناهەکەیەوە تەنها خۆی لەناو نەچوو!“

یەشوع ٢٢:٢٠

دوای کۆمەڵ مەکەوە بۆ کاری خراپ و لە سکاڵاکردندا بە خواری شایەتی مەدە.

دەرچوون ٢٣:٢

چونکە ئەو دەرگایە پانە و ئەو ڕێگایە بەرینە کە بەرەو لەناوچوون دەچێت و زۆرن ئەوانەی پێیدا دەچنە ژوورەوە.

مەتا ٧:١٣

لەبەر ئەوەی کەسمان بۆ خۆی ناژیێت.

ڕۆما ١٤:٧

ئەی خوشک و برایانم، ئێوە بۆ ئازادی بانگکراون، بەڵام ئازادی مەقۆزنەوە بۆ ڕازیکردنی سروشتی دنیایی، بەڵکو بە خۆشەویستی خزمەتی یەکتری بکەن.

گەلاتیا ٥:١٣

بەڵام وریابن سەربەستیتان نەبێتە کۆسپ بۆ لاوازەکان. ئاواش گوناه لە دژیان دەکەن و ویژدانی لاوازیان بریندار دەکەن، گوناه لە دژی مەسیح دەکەن.

یەکەم کۆرنسۆس ٨:٩, ١٢

هەموومان وەک مەڕ وێڵ و سەرگەردان بووین، هەریەکەمان ملی ڕێگای خۆی گرتووە، بەڵام یەزدان هەموو تاوانەکانی ئێمەی خستە سەر ئەو.

ئیشایا ٥٣:٦