ڕووناکی ڕۆژانە, حوزەیران ٢٠: ئەم منداڵە ببە و شیری بدە بۆم

ئەم منداڵە ببە و شیری بدە بۆم، منیش کرێیەکەت دەدەمێ. ژنەش منداڵەکەی برد و شیری دایێ.

دەرچوون ٢:٩

ئێوەش بڕۆن لە ڕەزەکەمدا کار بکەن، چەندتان بکەوێ دەتاندەمێ.

مەتا ٢٠:٤

ئەوەی بە ناوی منەوە جامێک ئاوی پێدان، لەبەر ئەوەی هی مەسیحن، ڕاستیتان پێ دەڵێم پاداشتی ون نابێت.

مەرقۆس ٩:٤١

چاوتێر دەوڵەمەند دەبێت، ئاوگێڕیش ئاوی دەدرێتێ.

پەندەکانی سلێمان ١١:٢٥

خودا زۆردار نییە کاری ئێوە لەبیر بکات، هەروەها ئەو خۆشەویستییەتان لەبیر ناکات کە بۆ خودا لە خزمەتکردنی گەلی پیرۆزی خۆی دەرتانبڕی و هەتا ئێستا بەردەوامن.

عیبرانییەکان ٦:١٠

هەریەکە بەگوێرەی ماندووبوونی خۆی کرێی خۆی وەردەگرێت.

یەکەم کۆرنسۆس ٣:٨

گەورەم، کەی تۆمان بە برسیێتی بینیوە و نانمان داویتێ، یان تینوو و ئاومان داویتێ؟ کەی تۆمان بە نامۆیی بینیوە و شوێنمان کردوویتەوە، یان بە ڕووتی و جلمان لەبەرکردوویت؟ «ئینجا پاشا وەڵامیان دەداتەوە: ”ڕاستیتان پێ دەڵێم، هەرچییەکتان بۆ یەکێک لەم برا بچووکانەم کردووە، بۆ منتان کردووە.“ ... وەرن ئەی ئەوانەی باوکم بەرەکەتی پێدان، ببنە میراتگری ئەو شانشینە کە لە دامەزراندنی جیهانەوە بۆتان ئامادە کراوە.

مەتا ٢٥:٣٧–٣٨, ٤٠, ٣٤

ڕێڕەو و جێی ڕاکشانی منت پێواوە.

زەبوورەکان ١٣٩:٣

کاتێک یاقوب خەبەری بووەوە، گوتی: «بێگومان یەزدان لەم شوێنەیە، منیش نەمزانی!» ترسیش دایگرت و گوتی: «ئەم شوێنە چەند ترسناکە! ئەمە هیچی دیکە نییە ماڵی خودا نەبێت، ئێرەش دەروازەی ئاسمانە.»

پەیدابوون ٢٨:١٦–١٧

چونکە چاوەکانی یەزدان چاودێرن بەسەر هەموو زەویدا، بۆ ئەوەی ئەوانە بەهێز بکات کە بە هەموو دڵیانەوە لەگەڵیدان.

دووەم پوختەی مێژوو ١٦:٩

ئەی یەزدان، بە ئاشتی پاڵ دەدەمەوە و دەخەوم، چونکە تەنها تۆ بە ئاسوودەیی نیشتەجێم دەکەیت.

زەبوورەکان ٤:٨

ئەگەر یەزدانت کرد بە پەناگات، هەرەبەرزت کرد بە لانەی خۆت، هیچ خراپەت بەسەرنایەت و هیچ بەڵایەک لە ماڵت نزیک ناکەوێتەوە. لەبەر ئەوەی سەبارەت بە تۆ فەرمان بە فریشتەکانی دەدات، بۆ ئەوەی لە هەموو هەنگاوێکت بتپارێزن.

زەبوورەکان ٩١:٩–١١

کاتێک ڕادەکشێیت بێ ترسیت، ڕادەکشێیت و خەوت خۆش دەبێت.

پەندەکانی سلێمان ٣:٢٤

چونکە خەو بە خۆشەویستانی خۆی دەبەخشێت.

زەبوورەکان ١٢٧:٢