ڕووناکی ڕۆژانە, حوزەیران ٩: دەمی شیرینە، سەراپای خۆشەویستە

هەرگیز کەس وەک ئەمە قسەی نەکردووە!

یۆحەنا ٧:٤٦

تۆ جوانترینی لەناو ئادەمیزاد و نیعمەت بەسەر لێوتدا باریوە، چونکە خودا بۆ هەتاهەتایە بەرەکەتداری کردوویت.

زەبوورەکان ٤٥:٢

یەزدانی باڵادەست زمانی فێربووانی پێم بەخشی بۆ ئەوەی بزانم کە چۆن بە قسە یارمەتی ماندوو بدەم. هەموو بەیانییەک بەخەبەرم دەهێنێتەوە.

ئیشایا ٥٠:٤

دەمی شیرینە، سەراپای خۆشەویستە. ئەمە دڵدارەکەمە، ئەو ئازیزی منە.

گۆرانی گۆرانییەکان ٥:١٦

هەموو شایەتییان بۆ دەدا، سەرسام بوون لەو پەیامە پڕ لە نیعمەتەی لە دەمی دەهاتە دەرەوە.

لۆقا ٤:٢٢

چونکە وەک دەسەڵاتدارێک فێری دەکردن، نەک وەکو مامۆستایانی تەورات.

مەتا ٧:٢٩

با پەیامی مەسیح بە دەوڵەمەندی لە ئێوەدا نیشتەجێ بێت.

کۆلۆسی ٣:١٦

هەروەها کڵاوی ئاسنینی ڕزگاری لەسەر بکەن و شمشێری ڕۆحی پیرۆز هەڵبگرن کە پەیامی خودایە.

ئەفەسۆس ٦:١٧

چونکە پەیامی خودا زیندووە، کاریگەرە، لە هەموو شمشێرێکی دوودەم تیژترە.

عیبرانییەکان ٤:١٢

چونکە ئەو چەکەی شەڕی پێدەکەین جیهانی نییە، بەڵکو چەکی خوداییە کە توانای وێرانکردنی قەڵای هەیە. هەموو بەڵگەیەک و هەر شتێک کە بۆ بەرهەڵستی زانیاری خودا دەربکەوێت لەناوی دەبەین، هەموو بیرێکیش بۆ گوێڕایەڵی مەسیح بە دیل دەگرین.

دووەم کۆرنسۆس ١٠:٤–٥

هاواری خۆشی خراپەکاران کورتە و خۆشی خوانەناس بۆ ساتێکە.

ئەیوب ٢٠:٥

تۆش پاژنەی پێی دەکوتیت.

پەیدابوون ٣:١٥

بەڵام ئەمە کاتی ئێوەیە، کاتی دەسەڵاتی تاریکییە.

لۆقا ٢٢:٥٣

بۆیە کە منداڵەکان لە گۆشت و خوێن بەشدارن، ئەویش بە هەمان شێوە بەشداری لە سروشتی مرۆڤایەتییان کرد، تاکو بەهۆی مردنی خۆیەوە شەیتان لەناوببات کە هێزی مردنی هەیە.

عیبرانییەکان ٢:١٤

سەرۆکەکان و دەسەڵاتدارانی چەککرد و بە ئاشکرا کردنییە پەند و لە خاچدا بەسەریاندا زاڵبوو.

کۆلۆسی ٢:١٥

چاوکراوە بن و ئێشک بگرن، شەیتانی دوژمنتان وەک شێرێکی بە نەڕەنەڕ دەسووڕێتەوە، بەدوای یەکێکدا دەگەڕێ بۆ ئەوەی بیخوات. بەربەرەکانێی بکەن، لە باوەڕەکە بچەسپێن.

یەکەم پەترۆس ٥:٨–٩

بەرهەڵستی شەیتان بکەن، لێتان هەڵدێت.

یاقوب ٤:٧

خراپەکار پیلان لە دژی کەسی ڕاستودروست دادەڕێژێت و ددانی لێ جیڕدەکاتەوە، بەڵام پەروەردگار پێی پێدەکەنێت، چونکە دەزانێت ڕۆژی دێت.

زەبوورەکان ٣٧:١٢–١٣

خودای ئاشتی بەم زووانە شەیتان لەژێر پێتان پان دەکاتەوە.

ڕۆما ١٦:٢٠

ئەو ئیبلیسەی چەواشەی دەکردن فڕێدرایە دەریاچەی ئاگر و گۆگرد ... هەتاهەتایە شەو و ڕۆژ ئازار دەدرێن.

ئاشکراکردن ٢٠:١٠