ڕووناکی ڕۆژانە, ئازار ٤: بایەخ بەو شتانەی سەرەوە بدەن

بایەخ بەو شتانەی سەرەوە بدەن، نەک ئەوانەی لەسەر زەوین.

کۆلۆسی ٣:٢

نە جیهانتان خۆشبوێت، نە ئەو شتانەی لە جیهاندایە. ئەگەر یەکێک جیهانی خۆشبوێ، ئەوا خۆشەویستی باوکی تێدا نییە.

یەکەم یۆحەنا ٢:١٥

لەسەر زەوی سامان بۆ خۆتان کۆمەکەنەوە کە مۆرانە و ژەنگ لێی دەدەن و دز دەیبڕێت و دەیدزێت. بەڵکو سامان بۆ خۆتان لە ئاسمان کۆبکەنەوە کە مۆرانە و ژەنگ لێی نادەن و دزیش نایبڕێت و نایدزێت، چونکە سامانت لەکوێ بێت، دڵیشت لەوێ دەبێت.

مەتا ٦:١٩–٢١

چونکە بە باوەڕ دەڕۆین نەک بە بینراو.

دووەم کۆرنسۆس ٥:٧

بۆیە ورە بەرنادەین. ئەگەر بە ڕواڵەتیش لەناوبچین، ئەوا ناخمان ڕۆژ بە ڕۆژ نوێتر دەبێتەوە، چونکە تەنگانەی سووک و کاتیمان شکۆمەندییەکی گرانی هەتاهەتایی بۆ ئێمە لێ دێتە کایەوە. ئێمە تەماشای شتە بینراوەکان ناکەین، بەڵکو شتە نەبینراوەکان، چونکە بینراوەکان کاتین، بەڵام نەبینراوەکان هەمیشەیین.

دووەم کۆرنسۆس ٤:١٦–١٨

بۆ میراتێک کە نافەوتێت و گڵاو نابێت و کاڵ نابێتەوە. ئەو میراتە بۆ ئێوە لە ئاسمان پارێزراوە.

یەکەم پەترۆس ١:٤

شانی دەچەمێتەوە بۆ بار و دەبێتە کۆیلەی کاری زۆرەملێ.

پەیدابوون ٤٩:١٥

خوشکان، برایان، نموونە وەربگرن لە بەرگەی ئازار و ئارامگرتنی ئەو پێغەمبەرانەی کە بە ناوی یەزدانەوە قسەیان کرد.

یاقوب ٥:١٠

جا ئەم شتانەیان وەک پەند بەسەرهات، بۆ ئاگاداری ئێمەش نووسراوە، کە لە کۆتایی زەمان دەژین.

یەکەم کۆرنسۆس ١٠:١١

بەڵام نەهامەتی قبوڵ نەکەین؟ لە هەموو ئەمەدا ئەیوب گوناهی بەسەر لێودا نەهات.

ئەیوب ٢:١٠

هارون بێدەنگ بوو.

لێڤییەکان ١٠:٣

خۆی یەزدانە، ئەوەی بە باشی بزانێت با بیکات.

یەکەم ساموئێل ٣:١٨

خەمەکانت بە یەزدان بسپێرە، ئەو پشتگیریت دەکات.

زەبوورەکان ٥٥:٢٢

بە دڵنیاییەوە دەردەکانی ئێمەی هەڵگرت، ئازارەکانی ئێمەی برد.

ئیشایا ٥٣:٤

«وەرن بۆ لام ئەی هەموو ماندووان و بارگرانەکان، من دەتانحەسێنمەوە. نیری من بخەنە سەر خۆتان و لە منەوە فێربن، چونکە دڵنەرم و بێفیزم، حەسانەوەش بۆ دەروونتان دەدۆزنەوە، چونکە نیرەکەم گونجاوە و بارم سووکە.»

مەتا ١١:٢٨–٣٠