ڕووناکی ڕۆژانە, ئازار ٢٣: نزیکی ئێرە مەکەوە (دەرچوون ٣:٥)

پیرۆزە، خودای پەروەردگاری هەرە بەتوانا.

ئاشکراکردن ٤:٨

لەگەڵ ئەوەشدا، تۆ خودای پیرۆزیت، لەنێو ستایشی ئیسرائیل دانیشتوویت.

زەبوورەکان ٢٢:٣

نزیکی ئێرە مەکەوە. پێڵاوەکانت لە پێت دابکەنە، چونکە ئەو شوێنەی تۆ لەسەری وەستاویت خاکێکی پیرۆزە ... من خودای باوکتم، خودای ئیبراهیم و خودای ئیسحاق و خودای یاقوبم. موسا ڕووی خۆی داپۆشی، چونکە دەترسا تەماشای خودا بکات.

دەرچوون ٣:٥–٦

خودای پیرۆز دەفەرموێت: «لەگەڵ کێ هاوشێوەم دەکەن؟ من هاوتای کێم؟

ئیشایا ٤٠:٢٥

چونکە من یەزدانم، خودای تۆم، پیرۆزەکەی ئیسرائیل، ڕزگارکەری تۆ. ... منم، منم یەزدان، لە من بەولاوە ڕزگارکەر نییە.

ئیشایا ٤٣:٣, ١١

بەڵکو هەروەک ئەوەی بانگی کردوون پیرۆزە، ئێوەش لە هەموو هەڵسوکەوتێک پیرۆز بن، چونکە نووسراوە: ﴿پیرۆز بن، چونکە من پیرۆزم.﴾.

یەکەم پەترۆس ١:١٥–١٦

یاخود نازانن کە لەشتان پەرستگای ڕۆحی پیرۆزە کە لە ئێوەدایە و لەلایەن خوداوەیە هەتانە؟ ئێوەش هی خۆتان نین.

یەکەم کۆرنسۆس ٦:١٩

چونکە ئێمە پەرستگای خودای زیندووین، وەک خودا فەرموویەتی: ﴿تێیاندا نیشتەجێ دەبم و لەگەڵیان دەڕۆم، دەبم بە خودای ئەوان و ئەوانیش دەبن بە گەلی من.﴾.

دووەم کۆرنسۆس ٦:١٦

ئایا دووان پێکەوە هاتوچۆ دەکەن، بێ ئەوەی ڕێک بکەون؟

ئامۆس ٣:٣

ئەوانیش زۆر لێی پاڕانەوە و گوتیان: لەلامان بمێنەرەوە.

لۆقا ٢٤:٢٩

ئەوەتا لە بەردەرگا وەستاوم و لە دەرگا دەدەم. ئەگەر یەکێک گوێی لە دەنگم بوو و دەرگاکەی کردەوە، لێی دێمە ژوورەوە و نانی لەگەڵ دەخۆم، ئەویش لەگەڵ من.

ئاشکراکردن ٣:٢٠

ئەی خۆشەویستی گیانم، پێم بڵێ، لەکوێ مێگەلی خۆت دەڵەوەڕێنیت، کاتی نیوەڕۆش پشتیری مەڕەکانت لەکوێیە؟ بۆچی وەک پەچەکراوێک بم، لەلای مێگەلی هاوڕێیەکانت؟

گۆرانی گۆرانییەکان ١:٧

کاتێک ئەوەم بینییەوە کە گیانم خۆشی دەوێت. گرتم و بەرمنەدا.

گۆرانی گۆرانییەکان ٣:٤

بۆ ئەوەی دڵدارەکەم بێتە ناو باخچەکەی خۆی، با بەروبوومە هەڵبژاردەکەی تام بکات.

گۆرانی گۆرانییەکان ٤:١٦

هاتمە ناو باخچەکەم.

گۆرانی گۆرانییەکان ٥:١

بە توخمی یاقوبم نەفەرموو، بەخۆڕایی بەدوامدا بگەڕێن.

ئیشایا ٤٥:١٩

دڵنیابن من هەموو ڕۆژێک لەگەڵتانم، هەتا کۆتایی زەمان.

مەتا ٢٨:٢٠

﴿هەرگیز پشتگوێت ناخەم، هەرگیز وازت لێ ناهێنم.﴾.

عیبرانییەکان ١٣:٥

چونکە لە هەرکوێیەک دوو یان سێ کەس بە ناوی منەوە کۆببنەوە، من لەوێ لەنێوانیاندا دەبم.

مەتا ١٨:٢٠

پاش ماوەیەکی کەم ئیتر جیهان نامبینێت، بەڵام ئێوە دەمبینن.

یۆحەنا ١٤:١٩