ڕووناکی ڕۆژانە, ئاب ٢٢: لەبەر ئەوەی کەسمان بۆ خۆی ناژیێت

لەبەر ئەوەی کەسمان بۆ خۆی ناژیێت، کەسیش بۆ خۆی نامرێت.

ڕۆما ١٤:٧

لەبەر ئەوەی ئەگەر بژین بۆ مەسیحی خاوەن شکۆ دەژین، ئەگەر بشمرین لە پێناوی ئەو دەمرین. کەواتە بژین یان بمرین، ئێمە هی مەسیحین.

ڕۆما ١٤:٨

کەس بەدوای بەرژەوەندی خۆیدا نەگەڕێت، بەڵکو بۆ بەرژەوەندی خەڵک هەوڵ بدەن.

یەکەم کۆرنسۆس ١٠:٢٤

چونکە ئێوە بە نرخێک کڕاون. جا بە جەستەتان ڕێزی خودا بگرن.

یەکەم کۆرنسۆس ٦:٢٠

بەڵکو ورەم بەرز بێت بۆ ئەوەی ئێستاش وەکو هەمیشە مەسیح لە جەستەمدا پایەدار بێت، ئەگەر بە ژیان بێت یان بە مردن، چونکە بۆ من ژیان مەسیحە، مردنیش قازانج. بەڵام ئەگەر ژیانم لە جەستە بەردەوام بێت، خەریکی خزمەتێک دەبم کە بەرهەمی هەبێت. چی هەڵبژێرم؟ نازانم! لە دوو لاوە فشارم لەسەرە، حەز دەکەم ئەم ژیانە بەجێبهێڵم و لەگەڵ مەسیح بژیم، ئەوە زۆر باشترە.

فیلیپی ١:٢٠–٢٣

چونکە لە ڕێگەی شەریعەت بۆ شەریعەت مردم، تاکو بۆ خودا بژیم. من لەگەڵ مەسیح لە خاچ درام، ئیتر من نیم ئەوەی دەژیێت، بەڵکو مەسیحە لە مندا دەژیێت. ئێستاش کەوا بە جەستە دەژیم، ئەوا بە باوەڕ بە کوڕی خودا دەژیم، ئەوەی منی خۆشویست و خۆی کردە قوربانی بۆ من.

گەلاتیا ٢:١٩–٢٠

هەروەها مێشکێکی فراوان وەک ئەو لمەی لەسەر کەناری دەریایە.

یەکەم پاشایان ٤:٢٩

ئەوەتا لە سلێمان مەزنتر لێرەیە.

مەتا ١٢:٤٢

میری ئاشتی.

ئیشایا ٩:٦

لەبەر ئەوەی بە دەگمەن کەسێک لە پێناوی مرۆڤێکی ڕاستودروست دەمرێت، لەوانەیە لە پێناوی مرۆڤێکی باش کەسێک بوێرێت بمرێت. بەڵام خودا خۆشەویستی خۆی بۆ دەرخستین، بەوەی مەسیح لە پێناوی ئێمەدا مرد، کاتێک هێشتا گوناهبار بووین.

ڕۆما ٥:٧–٨

ئەوەی بە سروشتی خۆی خودایە، نەیویست یەکسانییەکەی لەگەڵ خودا بۆ خۆی بقۆزێتەوە، بەڵکو خۆی کردە هیچ، شێوەی بەندەی وەرگرت، وەک مرۆڤی لێهات، کە بە ڕوخساری مرۆڤ بینرا، خۆی نزم کردەوە و هەتا مردن ملکەچ بوو،تەنانەت مردنی سەر خاچ.

فیلیپی ٢:٦–٨

تاکو ئەم خۆشەویستییە بناسن کە لە سەرووی زانیارییەوەیە.

ئەفەسۆس ٣:١٩

مەسیح هێز و دانایی خودایە.

یەکەم کۆرنسۆس ١:٢٤

کە لە ئەودا هەموو گەنجینەی دانایی و زانیاری شاردراوەتەوە.

کۆلۆسی ٢:٣

مژدەی دەوڵەمەندی بێ سنووری مەسیح بدەمە نەتەوەکان و.

ئەفەسۆس ٣:٨

بەڵام ئێوە بەهۆی خوداوە لەگەڵ عیسای مەسیحدا بوونە یەک، کە خودا بۆ ئێمەی کرد بە دانایی و ڕاستودروستی و پیرۆزکردن و کڕینەوە.

یەکەم کۆرنسۆس ١:٣٠